ប្រវត្តិទំនាក់ទំនងរវាងកម្ពុជា និងកូរ៉េខាងត្បូង

ទំនាក់ទំនងរវាងព្រះរាជាណាចក្រកម្ពុជា និងសាធារណរដ្ឋកូរ៉េខាងត្បូង ត្រូវបានបង្កើតឡើងជាផ្លូវការកាលពីឆ្នាំ ១៩៩៧ បន្ទាប់ពីកម្ពុជា បានចូលរួមជាសមាជិកអាស៊ាន និងបន្តនយោបាយ បើកចំហជាមួយប្រទេសភាគច្រើននៅអាស៊ី។ ទោះបីជាកូរ៉េខាងត្បូង និងកម្ពុជាមានប្រវត្តិវប្បធម៌ និងសាសនាផ្សេងគ្នា ប៉ុន្តែប្រទេសទាំងពីរបានចាប់ផ្តើមសហការនៅក្នុងវិស័យនានា ដើម្បីបង្កើនមិត្តភាព និងការអភិវឌ្ឍន៍រួមគ្នា។

មុនឆ្នាំ ១៩៩៧ ក៏មានទំនាក់ទំនងមិនផ្លូវការខ្លះៗ តាមរយៈអង្គការអន្តរជាតិ និងការជួយបែបមនុស្សធម៌។ កូរ៉េខាងត្បូងបានផ្ញើស្ថាបនិកសហគមន៍សេវាកម្មជួយសង្គម (KOICA: Korea International Cooperation Agency) មកចាប់ផ្តើមគម្រោងអភិវឌ្ឍន៍តូចៗនៅកម្ពុជាដោយផ្តោតលើ សុខាភិបាល កសិកម្ម និងការអប់រំ។ វាជាចំណុចចាប់ផ្តើមនៃការចងក្រងមិត្តភាពរយៈពេលវែង។

១. ទំនាក់ទំនងការទូត និងនយោបាយ

ការទាក់ទងការទូតត្រូវបានបង្កើតឡើងជាផ្លូវការក្នុងខែតុលា ឆ្នាំ ១៩៩៧។ ប្រទេសទាំងពីរបានបើកស្ថានទូតនៅរាជធានីភ្នំពេញ និងរដ្ឋធានីសេអូល។ ចាប់តាំងពីពេលនោះមក ការទំនាក់ទំនងនយោបាយរបស់ប្រទេសទាំងពីរបានរីកចម្រើនយ៉ាងលឿន។

កូរ៉េខាងត្បូងគឺជាប្រទេសមួយក្នុងចំណោមមិត្តជិតស្និទ្ធបំផុតនៃកម្ពុជា នៅក្នុងអាស៊ីបូព៌ា។ ប្រទេសទាំងពីរបានផ្លាស់ប្តូរការទស្សនកិច្ចជាបន្តបន្ទាប់ រួមទាំងការជួបជុំរបស់ប្រមុខរាជរដ្ឋាភិបាល និងប្រមុខរដ្ឋ។ ឧទាហរណ៍៖

• ឆ្នាំ ២០០៦ លោកប្រមុខរាជរដ្ឋាភិបាល ហ៊ុន សែន បានធ្វើទស្សនកិច្ចផ្លូវការទៅកូរ៉េខាងត្បូង។
• ឆ្នាំ ២០១៤ លោកស្រីប្រធានាធិបតី ប៉ាក់ គឺនហ៊េ (Park Geun-hye )បានអញ្ជើញចូលរួមកិច្ចប្រជុំអាស៊ាន–កូរ៉េ នៅប៊ូសាន់ ដែលកម្ពុជាជាប្រទេសសមាជិកសកម្ម។
• ឆ្នាំ ២០២២ លោកប្រធានាធិបតី យូន សងយ៉ល(Yoon Suk-yeol )បានបន្តគោរពទំនាក់ទំនងល្អជាមួយកម្ពុជា តាមរយៈកិច្ចសហប្រតិបត្តិការសេដ្ឋកិច្ច និងវប្បធម៌។

កូរ៉េខាងត្បូងក៏បានគាំទ្រកម្ពុជានៅលើវេទិកាអន្តរជាតិ ដូចជា សមាគមអាស៊ាន, សម្ព័ន្ធសហប្រជាជាតិ និងកិច្ចប្រជុំអាស៊ីបូព៌ា។ ព្រមទាំងជួយពង្រឹងស្ថិរភាពនយោបាយ និងសន្តិសុខក្នុងតំបន់។

២. ទំនាក់ទំនងសេដ្ឋកិច្ច និងការអភិវឌ្ឍន៍

សេដ្ឋកិច្ចគឺជាវិស័យសំខាន់បំផុតមួយក្នុងទំនាក់ទំនងរវាងប្រទេសទាំងពីរ។ កូរ៉េខាងត្បូងជាអ្នកវិនិយោគចម្បងមួយនៅកម្ពុជា។ តាមទិន្នន័យរដ្ឋបាលកម្ពុជាបានបង្ហាញថា ការវិនិយោគរបស់កូរ៉េខាងត្បូងស្ថិតក្នុងចំណោម ១០ ប្រទេសដំបូងដែលវិនិយោគខ្ពស់បំផុត។

គម្រោងវិនិយោគរបស់កូរ៉េមានច្រើនដូចជា៖

• អចលនទ្រព្យ និងសំណង់៖ គម្រោងអគារលំនៅដ្ឋាន និងសណ្ឋាគារ Seoul Royal Condominium និង Gold Tower 42 នៅភ្នំពេញ។
• វិស័យឧស្សាហកម្ម៖ រោងចក្រផលិតសម្លៀកបំពាក់, សម្ភារៈអេឡិចត្រូនិច និងគ្រឿងសម្អាង។
• វិស័យបច្ចេកវិទ្យា និងទូរគមនាគមន៍៖ ការសហការរវាងក្រុមហ៊ុនកូរ៉េជាមួយក្រុមហ៊ុនមូលធនកម្ពុជាក្នុងការអភិវឌ្ឍបណ្តាញ 5G និងសេវាឌីជីថល។
• កូរ៉េខាងត្បូងក៏ជាអ្នកផ្តល់ជំនួយអភិវឌ្ឍន៍ធំមួយ ដោយមានគម្រោងជាច្រើនរបស់ KOICA (Korea International Cooperation Agency) ដែលផ្តោតលើការអប់រំ សុខាភិបាល ការគ្រប់គ្រងទឹក សន្តិសុខសង្គម និងបណ្តុះបណ្តាលបច្ចេកទេស។

៣. ទំនាក់ទំនងវប្បធម៌ អប់រំ និងសង្គម

• ការទំនាក់ទំនងវប្បធម៌រវាងប្រទេសទាំងពីរបានកើតឡើងយ៉ាងជិតស្និទ្ធ។ ភាពរីកចម្រើននៃវប្បធម៌កូរ៉េ (K-Wave) ដូចជា តន្ត្រី K-pop, ភាពយន្ត K-drama និងរួមជាមួយស្ទីលម៉ូតសម្លៀកបំពាក់កូរ៉េ K-fashion បានទាក់ទាញយុវជនកម្ពុជា។
• សាលារៀនកម្ពុជាជាច្រើនបានបញ្ចូលភាសាកូរ៉េជាវិជ្ជាសិក្សាជម្រើស។
• ជាបន្ថែម កូរ៉េខាងត្បូងក៏ផ្តល់អាហារូបករណ៍ជាច្រើនឲ្យនិស្សិតកម្ពុជា តាមរយៈគម្រោង Global Korea Scholarship (GKS) និងកម្មវិធីប្ដូរនិស្សិតរវាងសាកលវិទ្យាល័យនៃប្រទេសទាំងពីរ។ និស្សិតកម្ពុជាជា​ច្រើនកំពុងសិក្សានៅសេអូល ប៊ូសាន់ និងទីក្រុងដទៃទៀត។

នៅផ្នែកសង្គម ការងារនៅកូរ៉េខាងត្បូងក៏ជាស្ដង់ដារបង្កើតការរីកចម្រើនសម្រាប់ជីវភាពរបស់ពលករកម្ពុជា។ ការងារក្រៅប្រទេសនៅកូរ៉េតាមរយៈប្រព័ន្ធ EPS (Employment Permit Systems)បានផ្តល់ឱកាសដល់ពលករជាង ៥០,០០០ នាក់ ក្នុងការរកប្រាក់ចំណូល និងផ្ញើមកជួយគ្រួសារ។

៤. ទំនាក់ទំនងនយោបាយ និងសន្តិសុខតំបន់

កម្ពុជាបានគាំទ្រកូរ៉េខាងត្បូងក្នុងសេចក្តីប្រកាសសន្តិភាពលើប្រជាជនកូរ៉េទាំងពីរ។ ខណៈដែលកូរ៉េខាងត្បូងក៏គាំទ្រកម្ពុជា ក្នុងការរក្សាស្ថិរភាពនយោបាយ និងការអភិវឌ្ឍប្រជាធិបតេយ្យ និងសហប្រតិបត្តិការអាស៊ាន។ ប្រទេសទាំងពីរបានសហការចូលរួមចំណែកក្នុងការពង្រឹងសន្តិសុខតំបន់ និងប្រឆាំងអំពើភេរវកម្ម។

ប្រទេសទាំងពីរបានបង្កើត ក្រុមការងារសហប្រតិបត្តិការនយោបាយសេដ្ឋកិច្ចកម្ពុជា–កូរ៉េ (CKCC) ដើម្បីពង្រឹងការសហការលើគម្រោងអភិវឌ្ឍន៍ និងបណ្ដុះបណ្ដាលបុគ្គលិក។

៥. សេចក្តីសន្និដ្ឋាន

ទំនាក់ទំនងរវាងកម្ពុជា និងកូរ៉េខាងត្បូង បានរីកចម្រើនយ៉ាងគួរឱ្យកត់សម្គាល់ តាំងពីឆ្នាំ ១៩៩៧ មកដល់បច្ចុប្បន្ន។ ទំនាក់ទំនងប្រទេសទាំងពីរបានក្លាយជាមិត្តភាពយ៉ាងជិតស្និទ្ធ ដែលមានការចែករំលែកទំនាក់ទំនងល្អក្នុងវិស័យនយោបាយ សេដ្ឋកិច្ច វប្បធម៌ សង្គម និងសន្តិសុខ។

ក្នុងអនាគត ទំនាក់ទំនងនេះនឹងបន្តរីកចម្រើនបន្ថែមទៀត តាមរយៈការជួយគ្នាអភិវឌ្ឍប្រទេស បង្កើនវប្បធម៌យោគយល់ និងការផ្លាស់ប្តូរបច្ចេកវិទ្យា។ វាជាគំរូល្អនៃមិត្តភាពរវាងប្រទេសអាស៊ីដែលផ្អែកលើការគោរព សមភាព និងជួយគ្នាក្នុងផ្លូវសន្តិភាព។៕