នេះ គឺជាសត្វឆ្អឹងកងមួយ ប្រភេទដែលមានស្លាប ឬជាល្មូនយក្ស ក្នុងអំបូរដាយណូស័រ ដែលមានជីវិតរស់នៅ តាំងពីចុងសម័យ Cretaceous period មកម្លេះ។ សត្វនេះមានឈ្មោះថា pterosaur Quetzalcoatlus ។
តាមការចេញផ្សាយរបស់អង្គការ Society of Vertebrate Paleontology បានបង្ហាញថា សត្វ pterosaur Quetzalcoatlus ជាប្រភេទសត្វដែលមានទំហំធំយ៉ាងខ្លាំង បើមនុស្សឈរជិត ឃើញថា មនុស្សមានទំហំប៉ុនកូន កណ្ដុរប៉ុណ្នោះ។ សត្វនេះមានស្លាបប្រវែងរហូតដល់ទៅ១២ម៉ែត្រ ហើយមានកម្ពស់ជាង ១៨ ហ្វីត ដែលខ្ពស់ ជាងសត្វកវែងទៅទៀត ឯករបស់វាវិញមានប្រវែងជាង ៧ ហ្វីត និងក្បាលវែងប្រវែងរហូតដល់ជាង ៥ ហ្វីត ហើយអាចមានទម្ងន់ចន្លោះពី ២០០ ទៅ ២៥០ គីឡូក្រាម។
ដោយសារវាមានចំពុះវែង ប៉ុន្តែគ្មានធ្មេញ បានធ្វើឲ្យអ្នកជំនាញជឿថា វារកចំណីដោយឆក់ចាប់សត្វដែល មានមាឌតូចជាងវាជាចំណី ដូចទៅហ្នឹងសត្វត្មាតដែរ។ គួរឲ្យកត់សម្គាល់ថា សត្វនេះអាចដើរបានដោយដោយ ប្រើអវយវៈទាំងបួន គឺស្លាបទាំង២ទម្លាក់ចុះជាជំនួយទប់ដី និងជើងទាំងពីររបស់វាផងដែរ។
ក្រុមអ្នកស្រាវជ្រាវមកពី សកលវិទ្យាល័យ Portsmouth បានប្រើស្កែនស៊ីធី ដើម្បីពិនិត្យមើលហ្វូស៊ីល របស់សត្វ នេះ ហើយបានរកឃើញថា សត្វនេះមានឆ្អឹងកងក្នុងកញ្ចឹងកដែលមានលក្ខណៈដូចជាកង ប្រហោងក្នុង ដូច្នេះ ហើយទើបធ្វើឲ្យខ្លួនរបស់វាស្រាល និងអាចហើរបាន ទោះបីជាវាមានទំហំធំ និងធ្ងន់បែបនេះក៏ដោយ។
Comments
Post a Comment