នេះជាប្រទេស​ទាំង៥ នៅអាស៊ី ដែល​បាន​​ផ្លាស់ប្តូ​រដ្ឋធានី ទៅ​ទីតាំង​ថ្មី

១. ជប៉ុនបានប្តូររដ្ឋធានីពីទីក្រុង Kyoto ទៅទីក្រុង Tokyo នៅក្នុងឆ្នាំ 1869 ដើម្បី ស្ដារការគ្រប់គ្រងរបស់អធិរាជ និងកសាងប្រព័ន្ធគ្រប់គ្រងថ្មី និងសម្រេចបានកំណែទម្រង់នយោបាយ ដែលមានសារៈសំខាន់ខ្លាំងណាស់ក្នុងរបត់ប្រវត្តិសាស្រ្តរបស់ជប៉ុន។

ការផ្លាស់ប្តូរទៅកាន់ទីក្រុងតូក្យូគឺជាការផ្លាស់ប្តូរដ៏លំបាកមួយសម្រាប់ប្រជាជននៃទីក្រុងក្យូតូ។ វិមានអធិរាជក្យូតូ ត្រូវបានរក្សាទុកនៅឆ្នាំ 1877 ហើយសព្វថ្ងៃនេះ ទីធ្លាបើកជាសាធារណៈ។

២. ប្រទេសប៉ាគីស្ថានៈ ប្រទេសនេះបានផ្លាស់ប្តូររាជធានីពីទីក្រុង Karachi ទៅទីក្រុង Islamabad នៅក្នុងឆ្នាំ 1967 ដោយសារៈ

• ក្រុងអ៊ីស្លាម៉ាបាដជាចំណុចកណ្តាលនៃប្រទេស ដោយសារទីនេះអាចឲ្យប្រជាជនចេញចូលបានយ៉ាងងាយស្រួលពីគ្រប់ផ្នែកនៃប្រទេស មិនដូចការ៉ាជី ដែលមានទីតាំងនៅភាគខាងត្បូង និងងាយរងការវាយប្រហារពីសមុទ្រអារ៉ាប់។
• ទីក្រុង​អ៊ីស្លាម៉ាបាដ​មានទីតាំងនៅជិត​ទីស្នាក់ការ​កងទ័ព​ Rawalpindi និង​តំបន់​ជម្លោះ​កាស្មៀរ។
• រដ្ឋធានីថ្មីនេះបឹងឆ្លុះបញ្ចាំងពីវប្បធម៌ចម្រុះនៃប្រជាជនប៉ាគីស្ថាន។
• ការ៉ាជីត្រូវបានចាត់ទុកថាមិនស័ក្តិសមជារដ្ឋាធានីនោះទេ ព្រោះការអន្តរាគមន៍របស់ផលប្រយោជន៍អាជីវកម្មនៅក្នុងកិច្ចការរបស់រដ្ឋាភិបាល។

៣. ប្រទេសកាហ្សាស្ថាន បានប្តូររាជធានីរបស់ខ្លួន ពីទីក្រុង Almaty ទៅ Astana នៅក្នុងឆ្នាំ 1997 ដោយសារៈ

• តំបន់ជុំវិញទីក្រុង Almaty ងាយនឹងមានការរញ្ជួយដី។
• រដ្ឋាភិបាល​កាហ្សាស្ថានអាចចង់រើទីក្រុងរបស់ខ្លួនឲ្យឆ្ងាយពី​ព្រំដែន​ ប្រទេស​ជិតខាង​ដោយសារកង្វល់ពី​សន្តិសុខប្រទេសជាតិ ដែលអាច​បង្ក​ជា​បញ្ហា​នយោបាយ​ផ្សេងៗ។
• បញ្ហាប្រជាសាស្រ្ត៖ ការផ្លាស់ប្តូរនេះបានកាត់បន្ថយកំនើនប្រជាសាស្រ្តនៅក្នុងទីក្រុង Almaty ដែលកំពុងតែកើនឡើងប្រហែលជា 60,000 នាក់ក្នុងមួយឆ្នាំ។

៤. ប្រទេសមីយ៉ាន់ម៉ា៖ ប្រទេសនេះបានសម្រេចប្ដូរ​រាជធានីខ្លួនពីយ៉ាំងហ្គោន ទៅណៃពិដោ នៅឆ្នាំ២០០៦ ដោយសារបញ្ហាចំនួនប្រជា​ជនច្រើនពេក និងបញ្ហាស្ទះចរាចរណ៍ រួមជាមួយហេតុផលនយោបាយផងដែរ។ ណៃពិដោ ជា​ទីក្រុង​យុទ្ធសាស្រ្ត និង​ស្ថិត​នៅចំ​កណ្តាល​ប្រទេស​ជាង​ក្រុង យ៉ង់ហ្គូន។

៥. ប្រទេសឥណ្ឌូណេស៊ី៖ ឥណ្ឌូនេស៊ី គឺជាប្រទេសសម្រេចប្ដូររដ្ឋធានី​របស់​ខ្លួន​ចេញពី​ហ្សាការតា ទៅលើកោះកាលី​ម៉ាន់តាន់​ដែ​លមានចម្ងាយប្រហែល ២ពាន់គីឡូម៉ែត្រពីរដ្ឋធានី​ចាស់នេះ។ គម្រោង​ផ្លាស់ប្ដូររដ្ឋធានីនេះត្រូវ​បាន​ប្រកាសដំបូងតាំងពីឆ្នាំ ២០១៩ ដោយប្រធានា​ធិបតី​ឥណ្ឌូណេស៊ី ចូកូ វីដូដូ ហើយ​ទើប​តែត្រូវ​បាន​អនុម័តដោយសភាកាលពីថ្ងៃទី១៨ ខែមករា ឆ្នាំ២០២២។ ការផ្លាស់ប្ដូរ​រដ្ឋធានី​ជា​ផ្លូវការ​ត្រូវបាន​កំណត់​នៅឆ្នាំ ២០២៤ តែដោយច្បាប់បាន​អនុម័តរួចរាល់ ដំណើរការនៃការផ្លាស់ប្ដូរត្រូវបានអនុញ្ញាត​ជា​បណ្ដើរតាំងពីឆ្នាំ ២០២២ មកម្ល៉េះ។ ​

បន្ថែមពីលើចំនួនប្រជាជនដែលហ្សាការតាមិនអាចទ្រាំទ្របាន ប្រទេសអាស៊ី​អាគ្នេយ៍មួយនេះ សម្រេច​​ផ្លាស់ប្តូរ​រដ្ឋធានី​របស់​ខ្លួន​ដោយសារ​តែបញ្ហាបម្រែបម្រួល​អាកាសធាតុផងដែរ។ រដ្ឋធានី​ហ្សាការតា​ ​ជា​ទីក្រុង​ដែលរងគ្រោះពីការបំពុលបរិយា​កាស​ធ្ងន់ធ្ងរ មាន​វិបត្តិទឹកជំនន់ញឹកញាប់ និង​ជាទីក្រុង​ប្រឈម​ហានិភ័យជន់លិចដោយកំណើន​ទឹក​សមុទ្រ។ ការប្ដូររដ្ឋធានីហ្សាការតា គ្រោងនឹងចំណាយលុយ​ប្រមាណជិត៣៥ពាន់លាន​ដុល្លារដែលជា​ទំហំទឹកប្រាក់ដ៏ច្រើនសន្ធឹកសន្ធាប់៕