នេះគឺជាភ្នំភ្លើងដ៏ចំណាស់មួយក្នុងពិភពលោក ហើយភ្នំនេះ ជានិមិត្តរូបដ៏សំខាន់នៃប្រជាជនជប៉ុន និងប្រទេសជប៉ុនផងដែរ។ ភ្នំនេះមានឈ្មោះថា Fuji ។
ភ្នំ«ហ្វូជី គឺជាភ្នំដែលមានភាពល្បីល្បាញក្នុងពិភពលោក និងមានកំពស់រហូតដល់៣៧៧៦ម៉ែត្រ ជាភ្នំដែលមានកំពស់ជាងគេនៅក្នុងប្រទេសជប៉ុន និងមានទីតាំងស្ថិតនៅចម្ងាយប្រមាណជា១០០គីឡូម៉ែត្រភាគខាងលិចទីប្រជុំជននៃទីក្រុងតូក្យូ។ ផ្អែកតាមប្រវត្តិសាស្រ្ត ភ្នំហ្វុជីបានកកើតឡើងប្រមាណជា ១០០០០០ឆ្នាំមកហើយ ប៉ុន្តែនៅលើបាតសណ្ឋានដីនៃភ្នំនេះបានបង្ហាញថា ភ្នំនេះមានអាយុ ២០០០០ឆ្នាំមុនប៉ុណ្នោះ។ ភ្នំហ្វុជិ គ្របដណ្ដប់ដោយទេសភាពស្រស់ត្រកាលព័ទ្ធជុំវិញ ជាមួយនឹងទម្រង់រាងសាជីស្ទើរតែពេញជ្រុងល្អឥតខ្ចោះ។ ទោះបីជាសម្រស់ដ៏ស្រស់ស្អាតមិនអាចកាត់ថ្លៃបានយ៉ាងនេះក៏ពិតមែន តែអ្នកវិទ្យាសាស្ត្រខាងភូមិវិទ្យានៅតែបង្ហាញថា ភ្នំហ្វូជីគឺជាប្រភេទភ្នំភ្លើងសកម្មនៅឡើយដោយគេលើកឡើងថា ភ្នំហ្វូជីបានផ្ទុះចេញកម្អែលម៉ាក់មា និងផ្សែងអាប់ខ្មៅបំផុតសាយភាយរហូតដល់ទីក្រុងតូក្យូ លើកចុងក្រោយ គឺនៅក្នុងឆ្នាំ១៧០៧នៃគ.ស ។ ទោះបីជាភ្នំភ្លើងនេះមិនមានបន្ទុះធំបែបនេះទៀតក្តីតាំងពីពេលនោះមកក៏ដោយ តែភ្នំ Fuji នៅតែត្រូវបានចាត់ទុកថាជាភ្នំភ្លើងសកម្ម នៅអាស៊ីប៉ាស៊ីហ្វិកដដែល ហើយអ្នកវិទ្យាសាស្ត្រនៅតែតាមដានសកម្មភាពរបស់ភ្នំនេះជានិច្ច។ ភ្នំហ្វូជីមិនត្រឹមតែទាក់ទាញភ្ញៀវទេសចរដោយសារសម្រស់ធម្មជាតិដ៏អស្ចារ្យរបស់ភ្នំនេះប៉ុណ្ណោះទេ ប៉ុន្តែក៏ជាកន្លែងទាក់ទាញអ្នកឡើងភ្នំផងដែរ។
ជារៀងរាល់ឆ្នាំ មានអ្នកឡើងភ្នំរាប់ពាន់នាក់ប្រជែងគ្នាឡើងកំពូលភ្នំនេះ ដើម្បីកំសាន្តសប្បាយជាមួយទិដ្ឋភាពថ្ងៃរះ ព្រមទាំងទស្សនាទេសភាពនៅលើចង្កេះភ្នំពណ៌ខៀវថ្លា កំពូលភ្នំពណ៌ស និងជើងភ្នំដែលគ្របដណ្តប់ដោយភូមិប្រជាជនតូចៗផងដែរ។
Comments
Post a Comment